'ஆச்சி' என்றொரு மாபெரும் நடிகை...

                                                                                   

 - கோபால்தாசன்

...

ஒரு பச்சை மரத்தை
துளைத்தபடி நுழையும்
நிகழ்வு அது.
ஒரு வெளிச்சத்தை
எதிர்காலத்திற்கு திறந்து விட்டுக்கொண்டு
நெருப்பிலே
அணைந்து போனார்....

அவருடைய
பேச்சும் மூச்சும்
திரைவசனத்திலே
தோய்ந்திருந்தாலும்;
உடல் மொழியும்
முக நடிப்பும் கூட
திரைமண்ணிற்கு இட்ட உரம்

தமிழ் திரைக்கு
ராணியாகவும்
மனித நேயத்தில்
சாமியாகவும்
வாழ்ந்த அதிசயப் பிறவி

ஒரு நடிகையின்
இலக்கணமும்
இலக்கும் என்ன என்பதை
அவரிடம்தான்
டியூசன் கற்க வேண்டும்
மக்கள் வெள்ளத்தின் மீது
ஒரு சிற்றிலையாய்
மிதந்து மிதந்து சென்றது
அவரது இறுதி ஊர்வலம்

அந்த
ஊர்வலத்தின் பின்னணியில்
அவர் சென்னை தமிழிலும்
கோவை தமிழிலுமாய் பேசிய
வசனங்களின்
உச்சரிப்புகளின் எதிரொலிப்புகள்...

இனி எங்கே போய்த் தேடுவோம்
அந்த முகத்தை நடிப்பை
ஒரு வேளை
இதுவும் ஒரு நடிப்புதானா?

தொலைக்காட்சி பெட்டிகளில்
எந்த சேனலை திருப்பினாலும்
அவர் வந்து
ஞாபகப்படுத்துவாரே
ஓ! அதுதாம்
அவர் வாழ்ந்துகொண்டிருப்பதற்கான
ஆதாரமா?